035r - - - - - Pour dire a quelqu’un que tu luy monstreras
enseigneras une chose qu’il ne sçait pas
ne toy aussy
Ayes une fisselle ou petit baston et prens la mesure
despuys le bout de l’oreille jusques au bout de son nes,
puys luy fais voir. Ainsy tu luy enseigneras ce que tu
ne sçavois pas ne luy aussy.
Pour fayre soubstenir un seau d’eau
sur la poincte couchée de trois cousteaulx
sans toucher à terre
Figure
Selon la force de tes costeaulx, ou de cuisine ou de table, tu feras
soubstenir un grand pois sur leur poincte couchée & disposée en
triangle trenchant contre trenchant, comme tu vois, & ilz ne toucheroient
poinct à terre. Et si les ayant ainsi disposés tu les tournes de
l’aultre part sans les desjoindre, les bouts des manches pourront
aussi soubstenir poix sans toucher à terre. Tu peulx bien aproprier
cella à aultre usage avecq des piques, avecq des soliveaulx,
ou faire promptement un trepied au camp avecq trois poinctes
d’halebarde. Si le tranchant du costeau marqué A regarde de la
droicte à gaulche, le bout des manches se leveront, mays si
le tranchant du mesme costeau regarde de gaulche à droicte,
les poinctes s’esleveront.
Pour faire bouillir sans foeu dans de l’eau
froide un oeuf
Vuidés un œuf par les deulx bouts si bien qu’il ne demeure rien dedans,
puys l’emplissés de chaulx vive & de soufre vif, puys estoupés les
trous de cire & le mectés en eau de sorte qu’il nage deulx ou trois
doigts.
Pour faire sortir les connils d’un terrier
Prenés du brassier dans un pot, & ayant mis du soufre dessus,
mettés le dans les terriers & le bouchés de quelque legiere chose.