035r - - - - - Pour dire a quelquun que tu luy monstreras
enseigneras une chose quil ne scait pas
ne toy aussy
Ayes une fisselle ou petit baston et prens la mesure
despuys le bout de loreille jusques au bout de son nes
puys luy fais voir Ainsy tu luy enseigneras ce que tu
ne scavois pas ne luy aussy
Pour fayre soubstenir un seau deau
sur la poincte couchee de trois cousteaulx
sans toucher a terre
Figure
Selon la force de tes costeaulx ou de cuisine ou de table tu feras
soubstenir un grand pois sur leur poincte couchee & disposee en
triangle trenchant contre trenchant comme tu vois & ilz ne toucheroient
poinct a terre Et si les ayant ainsi disposes tu les tournes de
laultre part sans les desjoindre les bouts des manches pourront
aussi soubstenir poix sans toucher a terre Tu peulx bien aproprier
cella a aultre usage avecq des piques avecq des soliveaulx
ou faire promptement un trepied au camp avecq trois poinctes
dhalebarde Si le tranchant du costeau marque A regarde de la
droicte a gaulche le bout des manches se leveront Mays si
le tranchant du mesme costeau regarde de gaulche a droicte
les poinctes sesleveront
Pour faire bouillir sans foeu dans de leau
froide un oeuf
Vuides un œuf par les deulx bouts si bien quil ne demeure rien dedans
puys lemplisses de chaulx vive & de soufre vif puys estoupes les
trous de cire & le mectes en eau de sorte quil nage deulx ou trois
doigts
Pour faire sortir les connils dun terrier
Prenes du brassier dans un pot & ayant mis du soufre dessus
mettes le dans les terriers & le bouches de quelque legiere chose