034v - - - - - Pour fayre fondre ou transmuer
une bague mise dans une boitte
Figure
Ayes une boitte de buys rayée à cercles comme tu voys, dans laquelle
entrera une aultre petite boicte fort à layse, comme celle que tu voys marquée
B, et fais qu’elle ne touche pas le fonds de la grande marquée A, mays
qu’il y aye quelque distance. Il fault aussy que ce qui entre dans
la grande boicte soict bien uny, mays que le bort soict faict à cercles
affin qu’estants joinctes il semble que ce soict une mesme boicte.
Il te fault aussy avoir un couvercle de cuir rond de la longueur
de la boicte comme tu voys marquée C, qui entre bien à l’aissse &
entourne bien lesdictes boictes ainsy mises l’une dans l’aultre.
Et plustost que faire ton jeu de passe passe, il fault que tu
mectes au fonds de la grande boicte de la pouldre d’or ou
d’argent ou du mercure amalgamé avecq argent, et puys poses
la petite boicte marquée B dessus. Aprés, tenant la boicte avecq
le doigt indice dessus, tu la presente, et ne voyant que le fonds de
la petite boicte marquée B, on y mect une bague ou chose semblable.
Ce faict, posant ta boicte sur table, tu la couvre de la boicte
de cuir, et faisant les mines requises tu osteras la boicte
de cuir, & sans monstrer le dedans la poseras sur la table
& feras recognoistre la bague au mise au fonds de la petite
boicte marquée B. Puys tu remettras doulcement la boicte de cuir,
& aprés avoyr dict inhonorificabilitidinitadtudinibus, tu prendras
avecq les deulx doigts l’extremité de la boicte de cuir avecq la et,
la serrant plus que de coustume, tu d enleveras pe quand & quand
la petite boicte qui est dedans & qui contient la bague, & mettras
doulcement le tout sur la table, puys verseras la pouldre ou
amalgame qui est au fonds de la grand boite, puys remettras
la boicte de cuir avecq celle qui est dedans comme elle estoit au
commancement. Puys, ostant la boicte de cuir sans oster la petite,
tu monstreras la bague qui est au fonds revenue en son premier
estat, tenant le doigt indice sur le bord de la boicte affin quelle
ne coulle.