034v - - - - - Pour fayre fondre ou transmuer
une bague mise dans une boitte
Figure
Ayes une boitte de buys rayee a cercles comme tu voys dans laquelle
entrera une aultre petite boicte fort a layse comme celle que tu voys marquee
B et fais quelle ne touche pas le fonds de la grande marquee A mays
quil y aye quelque distance Il fault aussy que ce qui entre dans
la grande boicte soict bien uny Mays que le bort soict faict a cercles
affin questants joinctes Il semble que ce soict une mesme boicte
Il te fault aussy avoir un couvercle de cuir rond de la longueur
de la boicte comme tu voys marque C qui entre bien a l’aissse &
entourne bien les dictes boictes ainsy mises lune dans laultre
Et plustost que faire ton jeu de passe passe il fault que tu
mectes au fonds de la grande boicte de la pouldre dor ou
dargent ou du mercure amalgame avecq argent Et puys poses
la petite boicte marquee B dessus Apres tenant la boicte avecq
le doigt indice dessus tu la presente Et ne voyant que le fonds de
la petite boicte marquee B on y mect une bague ou chose semblable
Ce faict posant ta boicte sur table tu la couvre de la boicte
de cuir Et faisant les mines requises tu osteras la boicte
de cuir & sans monstrer le dedans la poseras sur la table
& feras recognoistre la bague au mise au fonds de la petite
boicte marquee B puys tu remettras doulcement la boicte de cuir
& apres avoyr dict inhonorificabilitidinitadtudinibus tu prendras
avecq les deulx doigts lextremite de la boicte de cuir avecq la et
la serrant plus que de coustume tu d enleveras pe quand & quand
la petite boicte qui est dedans & qui contient la bague & mettras
doulcement le tout sur la table puys verseras la pouldre ou
amalgame qui est au fonds de la grand boite puys remettras
la boicte de cuir avecq celle qui est dedans comme elle estoit au
commancement Puys ostant la boicte de cuir sans oster la petite
tu monstreras la bague qui est au fonds revenue en son premier
estat tenant le doigt indice sur le bord de la boicte affin quelle
ne coulle