033v - - - - - Pour fayre sembler que à quelqu’un
qu’il aura une piece d’argent au front
Ayes un gecton ou piece d’argent et la mouille et te la
fais tenir contre le front. Puys dis à l’assistant
que si tu la luy mects ainsy sur son front, qu’il ne la
pourra faire tumber sans y porter les mains, quelque
secouement qu’il fasse de la teste. Et faisant semblant
de la luy poser sur le front, retiens la dans la main
& mouille ton pouse de ta salive puys le presse bien fort
sur le front. Et pensant avoyr la piece au front à cause
de la froideur de la salive, il secouera les oreilles
& n’advancera rien.
Pour fayre sortir du front de
quelqu’un du sang ou du vin, ou d’une
muraille
Figure at left middle margin
Ayes un ambu ou entonnouer de fer blanc qui soict double
quand au corps d mays non pas la queue. Au bort du
hault, fais qu’il y aye un petit pertuis, & au un aultre
un peu plus grand à la doubleure de dedans, qui soict un
peu plus hault que le bout, ainsy que tu peulx voir à
l’exemple cy aposé. Puys, quand tu t’en vouldras servir,
mects dedans du vin ou de la rosette liquide de bresil ou
du just de cerises noires, et tenant le du petit doigt le pertuis
de la queue bouché, fais que l’ambu soict bien remply
affin que le vin en puysse entrer en la doubleure par le
pertuis du bort, & s’il n’entroict bien, faisant semblant de
taster du vin, suppe & attire un peu l’air à toy en beuvant
à l’endroict du petit pertuis. Aprés fais boire à l’un des
voisins assistans le reste du vin ou le jecte ou laisse couler
par le bout, mays plustost il te fault avoyr mis le
poulce bien pressé sur le pertuis du bord d’en hault, car
en ceste sorte par la compression de l’air le vin se retient
en la doubleure. Lors avecq un poinçon arrondy par
le bout & qui entre dans son manche, tu fais semblant de
percer le front à un qui tient un verre en la main, et pendant
que tu perces tu couvres ton faict avecq l’ambu que tu tiens pres du #
at left bottom margin
# front, puys ostant le
poulce de dessus le
pertuis du bord d’en
hault, l’air estant libre
fera que le vin sortira
de la doubleure par le
pertuis marqué B, & tumbera
par le bout marqué C
dans le verre. Mays
il fault bien faire
baisser la teste au
pelerin pour bien faire.