032v - - - - - Faiseur de natte
Ils en font a Thoulouse de deulx sortes, l’une pour tapisser la
paroy des chambres, qu’ilz tissent deliée comme presque
les chappeaulx de paille que portent les villageois. Et la
font en longues listes, les unes de la largeur de dix b pailles, les
aultres de treze. Et principallement y travaillent ilz l’esté. Et
l’hyver, lorsqu’ilz la mectent en besoigne, ilz la cousent. Mays
plustost ilz la mettent en la taincture et en font communement
de trois couleurs, verte, rouge et quelques fois violette.
La verte se faict dans la seule taincture du pastel,
pource que, le vert se faisant de jaulne et de bleu, le pastel
se deschargeant sur la paille qui monstre son jaulne bruny,
il se faict un vert gay. Pour le rouge, ilz usent d’alum
et bresil. Pour le violet, ilz employent le pastel & un peu
de coupperose, qui brunist par sa taincture noire le bleu.
Vitrier
Ils n’ont poinct l’invention de faire un rouge parfaict en
besoigne, qu’il fault recuire. Toutesfois essaye le rouge
d’Allemaigne, qui est rouge d’escaille. Ils font leur rouge
commun avecq de la sanguine, estain de glace, rocaille, litharge
& un peu descaille de fer. Ledict rouge se charge d’un costé
& d’aultre du verre affin qu’il aye plus de couleur, s’il n’estoit
charge que d’un costé il seroit trop orange pasle.
Fondeur
Ils acheptent xx lb le quintal de rosette, laquelle est plus dure à
fondre que le laicton à cause qu’elle est doulce. Car tant plus les
grands metaulx # sont doulx, tant plus ilz sont doulx difficiles à fondre.
L’estain de cloche, qui est estaim fin est plus et qui est aigre, est plus
aysé à fondre que le plomb, qui est doulx. Le laicton aigry par la
calamine est plus tost fondu que le cuivre rouge. Le metal, qui est
matiere de cloche, meslé d’estain et fort aigre, est bien tost fondu.
Tant plus l’argent est allié, tant plus tost il se fond, c’est pourquoy
la souldure s’en faict. En Allemaigne ilz font des chandeliers
fort legiers, c’est pource qu’ilz les tournent par le moyen de l’eau,
mays ilz sont frangibles. Le quintal de fine rosette de per chauldronier
se vend xxx ou 40 lb. D’aultre dont les fondeurs usent se vent xii
ou xv lb. Le quintal de metal, six lb.Le met
at left bottom margin
# Or, argent, cuivre,
leton, fer.