032r - - - - - Corps de cuirasse
Les lames haultes de l’espauliere du brassard sont
comme chef d’oeuvre des maistres car il fault que ces pieces
soient fort exactement vuidés & adjoustées affin que le mouvement
soict libre. Les corps de cuirasse doibvent estre fort
uniment battus & menés avecq le marteau.
Les morrions de Milan sont tous d’une piece & par ainsy
meilleurs que ceulx qui sont de deulx.
Painctre
Aussi tost que les couleurs des tableaulx sont bien seiches,
les Flamans les vernissent pource que elles ne se meurent
point plus qu’elles sont & demeurent en cet estat.
Celuy qui sçaict bien travailler à destrempe travaillera
bien à huile. Mays au contraire celuy qui sçait bien
travailler à huile ne travaillera pas à destrempe.
Pour coucher l’or à destrempe
Les scribes & painctres vulgaires font de la batture,
c’est colle de menusier destrempée en eau sur le foeu, mediocrement
claire, meslee de fort peu de miel, c’est à sçavoir quelques
gouttes pour faire griper. Et en forment des lettres ou
ce qu’ilz veulent dorer avecq le pinceau, et bientost
aprés couchent l’or, mays jamays ilz ne font leur
ouvrage bien net, et s’il y a beaucoup de miel, cela ne
seiche qu’à grand peine. Ceste couche se deffaict à la pluye.
Aultres font mieulx. Ilz destrempent du sucre candy
en eau et le meslent avecq de la sanguine, qu’ilz appellent
cocon, fort brayé, y adjoustant un peu de savon. Cestuy
se faict net & rend l’or beau si on en faict son assiette.