032r - - - - - Corps de cuirasse
Les lames haultes de lespauliere du brassard sont
comme chef doeuvre des maistres car il fault que ces pieces
soient fort exactement vuides & adjoustees affin que le mouvement
soict libre Les corps de cuirasse doibvent estre fort
uniment battus & menes avecq le marteau
Les morrions de milan sont tous dune piece & par ainsy
meilleurs que ceulx qui sont de deulx
Painctre
Aussi tost que les couleurs des tableaulx sont bien seiches
Les flamans les vernissent pourceque elles ne se meurent
point plus quelles sont & demeurent en cet estat
Celuy qui scaict bien travailler a destrempe travaillera
bien a huile Mays au contraire celuy qui scait bien
travailler a huile ne travaillera pas a destrempe
Pour coucher lor a destrempe
Les scribes & painctres vulgaires font de la batture
cest colle de menusier destrempee en eau sur le foeu mediocrement
claire meslee de fort peu de miel cest a scavoir quelques
gouttes pour faire griper Et en forment des lettres ou
ce quilz veulent dorer avecq le pinceau Et bien tost
apres couchent lor Mays jamays ilz ne font leur
ouvrage bien net Et sil y a beaucoup de miel cela ne
seiche qua grand peine Ceste couche se deffaict a la pluye
Aultres font mieulx Ilz destrempent du sucre candy
en eau et le meslent avecq de la sanguine quilz appellent
cocon fort braye y adioustant un peu de savon Cestuy
se faict net & rend lor beau si on en faict son assiette