Making and Knowing
A minimal edition of BnF Ms Fr 640

[TOC] | [translation]

- - - - - folio image: 031v - - - - -

Painctre

Les scribes font le renfondrement de la laque &
aultres couleurs de vestements avecq du iaulne doeuf
mays cela est tromperie et nest pas douree

Les aultres glassent avecq de la glaire doeuf les
rouges de mine & daultres qui ne sont pas belles a
huile M Et semble faict a huile Mais lhumidite corrompt
tout cella

Broisses

Prens de celles qui ont un peu servy aulx blanchisseurs
de chaulx vive car lasperite de la chaulx & lusage
les rend plus maniables

Paindre au naturel

Il ne fault pas entreprendre dy travailler en temps
obscur
pourceque tu ferois tes carnations plus brunes
quil ne fauldroit

Paindre daprest

Pour le bleu ilz prenent de lazur desmail du plus
gros & le broyent sur une escaille & y meslent deulx ou trois
patenostres de roquaille ou plus selon la quantite de la besoigne
Et ayant faict leur desseing de noir descaille (qui se paint
vers le jour et la piece de verre droicte) Ils couchent toutes
leurs pieces sur du papier blanc quand pour cognoistre par
la blancheur du papier le jour de leurs histoires et as y assoir
les couleurs qui sont dune sorte tout a un coup Puys ilz
recuisent