031r - - - - - [continued]
Leurs marteaulx doibvent estre bien unis & polis, et si par
cas fortuit la rouille les ou aultre usage les ha endomagés,
ilz les polissent premierement avecq pouldre d’esmery puys
les achevent de brunir & adoulcir avecq de la potée.
Aultrement ilz ne battroient pas net. Il fault aussy que
le plan des enclumes soict de mesme.
Nouvelle vigne
Estant bien prise, si tu veulx qu’elle gecte force
branches, l’ayant labourée, mects a chasque pied
deulx poignées de fiente de pigeon.
Eaulx coulourees
L’urine distillée, le vinaigre distillé et l’eau de
vye prenent taincture caerulée & verte de l’aes ustum
pulverisé et subtilement broyé. Et ceste taincture est
cuivre rouge en sa resideue, si tu distilles les susdictes
choses par filtre.
Vernis durant à l’eau
Le vernis de Flandres, faict de tourmentine & huile d’icelle
ou de mastic, se peult oster et ne soubstient poinct à la pluye.
Mays celuy qui est faict d’huile de noix blanche, comme tu la
fais, tient à la pluye et est fort cler & beau & bien tost sec.
C’est pourquoy on use d’iceluy aulx banieres & enseignes
painctes qu’on porte à la pluye.
Fruict de sucre
On ne les paint pas au pinceau comme les aultres s choses
de couleur destrempée, pource que le sucre se fondroit.
Mays on les frotte de couleur avecq le doigt.