Making and Knowing
A minimal edition of BnF Ms Fr 640

[TOC] | [translation]

- - - - - folio image: 031r - - - - -

[continued]

Leurs marteaulx doibvent estre bien unis & polis et si par
cas fortuit la rouille les ou aultre usage les ha endomages
ilz les polissent premierement avecq pouldre desmery puys
les achevent de brunir & adoulcir avecq de la potee
Aultrement ilz ne battroient pas net Il fault aussy que
le plan des enclumes soict de mesme

Nouvelle vigne

Estant bien prise si tu veulx quelle gecte force
branches layant labouree mects a chasque pied
deulx poignees de fiente de pigeon

Eaulx coulourees

Lurine distillee Le vinaigre distille et leau de
vye
prenent taincture caerulee & verte de laes ustum
pulverise et subtilement broye Et ceste taincture est
cuivre rouge en sa resideue Si tu distilles les susdictes
choses par filtre

Vernis durant a leau

Le vernis de flandres faict de tourmentine & huile dicelle
ou de mastic se peult oster et ne soubstient poinct a la pluye
Mays celuy qui est faict dhuile de noix blanche comme tu la
fais tient a la pluye est fort cler & beau & bien tost sec
Cest pourquoy on use diceluy aulx banieres & enseignes
painctes quon porte a la pluye

Fruict de sucre

On ne les paint pas au pinceau comme les aultres s choses
de couleur destrempee pourceque le sucre se fondroit
Mays on les frotte de couleur avecq le doigt