030v - - - - - [continued]
quelque escuelle ou assiette, ilz eslargissent & deffont
avecq un coup de marteau les coings de fer qui jouent
aulx branches de la roue. Et comme ilz sont à la coche et
poincts qu’il leur fault, il serrent lesdicts coings, les
coignant avecq le marteau.
Quand leurs plats ou escuelles sont esté gectés, resouldés
si besoing est, & repurgés des baves d’alentour avecq le
souldouer chault, & puys avecq une grosse raspe, ils
l’adaptent sur la roue; & premierement ilz entournent leur desgrusoue
desgrusouer d’une corde grosse corde comme le petit doigt, &
l’apuyent ferme sur la barre traversante pour le bien asseurer.
Et pendant qu’un aultre tourne la roue promptement, ilz
conduisent le trenchant de l’esgrusouer avecq la main s au
bord du rond cave, & doulcement le conduisent jusques au centre
du rond. Et ce desgrusouer est pour oster les premieres
peaulx rudes & grumeleuses de l’ouvrage. Et aprés ilz l’unissent
avecq une fer coupant apellé la plane, le tranchant duquel
ilz frottent avecq un peu de potée, sur du cuir cloué sur
un lopin de boisayant, et ce en telle sorte que la chair
ou fleur soict par dehors, car si le tranchant de ceste
plane n’estoict ainsy frotté & bruny, il ne poliroit pas &
bruniroit pas l’estain au qui demeurroit blanc & non pas
noir & bruny comme un mirouer. Au surplus, ilz reparent avecq
ceste plane pour la seconde fois l’ouvrage comme ilz ont
faict avecq l’esgrusouer. Puys avecq un costeau ou
aultre fer tranchant, ilz raclent les bords des plats
ou assiettes pour les adoulcir affin qu’ilz ne se trouvent
trenchants en les maniant.
[continued]