030r - - - - - Plomb
Le meilleur, plus gras & plus douls s’aporte d’Allemaigne,
qui n’est pas en saulmon mays en lattes de la longueur
du bras ou environ & de largeur de trois doigts. Il s’en porte
à Lyon, et de cestuy cy on faict à Noremberg la foeille
des petits mirouers.
Pintier
Ils font leurs moules aussy de metal, qui sont de plus grand
durée & moulent plus net que le grais, pource que la vaisselle
y vient sans baves & bien unye. Mays c’est pour les riches,
car un moule coste quinze ou seize frans. On en faict
principallement de metal pour bassins & esguieres & salieres
& semblabes choses qui sont figurées.
Pour les pintes, les moules se font de terre ardille blanche
meslée de fiente de cheval & bourre & fort battue pource que,
les pintes estant à demy rond enfoncées, elles ne se pourroient
pas bien despouiller dans le moule de grais comme dans la terre,
qui est doulce. On faict bien le noyau du moule desdictes
pinctes de grais.
Aulx moules de metal, on faict des souspirails et on gecte
à un coup, qui est cause qu’au milieu du plat il ne se faict
poinct une ligne noire enfumée, qui vient de la vapeur
& fumée du metal qui se gecte, qui est cause qu’en cet endroict
l’ouvraige est grumeleux & bien souvent percé. Toutesfois
ilz le reparent par la souldure du n, comme dict est. Ceste
fumée se faict sur le milieu au droit du gect & aulx moules
de grais
La vaisselle se peult marteler mar pour estre plus
vendable. Mays elle n’en dure pas tant.
Aulx branches de leur roue de fer, ilz ont des coches selon la
grandeur des plats & des assiettes. Et quand ilz veulent apliquer
[continued]