029r - - - - - Stuc pour mouler
Ayes de la gomme dragant et la mectes tremper jusques a ce quayant
beu son eau elle soict enflee & reduicte comme gelee Lors broyes la bien
fort sur le mabre & apres ayes de la farine de Segle qui est meilleure
que celle de froment a cause quelle est plus humide et ne rend pas la paste
si brusque Et en saulpouldres vostre gomme dragant & continues a broyer
et mesler ainsy peu a peu le et mesler legi la farine bien subtillement tamisee Et
la pestrisses comme si vous voulies faire du pain Jusques a ce que vous
vous cognoissies quelle aye asses de corps & soict ferme comme la paste du
pain quon veult mectre au four Cela se cognoist quand elle sestire
asses sans se rompre Et si elle nestoict asses forte elle ne se sti despouilleroit
pas bien Estant ainsy præparee frottes dhuile le cave au u avecq une
broisse affin que lhuile penetre par tout pour mieulx faire despouiller
Et presses la paste dedans bien fort Et si elle ne se despouille pas
bien mesles y encores de la farine jusques a ce quelle aye asses de corps
Avecq cella vous mouleres fort net telle ouvraige ou masques ou festons
quil vous plaira qui seront secs dans un iour Apres vous les apliqueres
avecq colle forte ou colle de paste comme il vous plaira Et les pourres
paindre et estoffer dor & toutes couleurs On en faict les ornements des
planchers a romme On en peult faire des ornements de lits Si tu veulx
que louvrage demeure blanc il vault mieulx mouler de plastre
au lieu de farine il est vray quil est plus brusc et plus ferme aussy
Mays il le fault præparer en ceste sorte Destrempe le estant en
pouldre fort dans bonne quantite deau de sorte quil soict clair & le
broye plusieurs fois le jour lespace de quinze jours Puys verse
leau par inclination Et ramasse le plastre & le broye subtillement sur
la mabre Et le pose en quelque vaisseau plombe & net quil ny
tombe aulcune poulsiere & ordure & le laisse a lair & au serain lespace
de quinze jours avecq son eau Et il deviendra mat fort blanc et
legier fort propre a faire assiete dor bruny Et de cestuy cy en
pouldre peulx tu mesler au lieu de farine parmy la gomme dragant
Et ton ouvraige sera fort beau En default de plastre tu y peulx
mesler de la croye bien broyee Ou de la ceruse & essayer du bol &
choses semblables Ce stuc avecq la gomme dragant a cela de propre
que comme il preste nestant pas encores sec il sacommode ou sur
choses rondes ou plattes comme il te plaira Cest pour faire un
ornement a peu de frais
at left top margin
La farine nest
bonne en cecy Ains
la croye ou ceruse