025v - - - - - Canonier
Au canon il y ha trois borlets: celuy de la culasse, celuy du milieu,
celuy de la bouche. Quand les fondeurs veulent pratiquer sur
leur besoigne ou rendre le canon ou aultre piece plus legere
& plus aisée à charrier il la font despuys le borlet de la culasse
jusques au borlet du milieu de la grosseur & proportion des
balles, comme dessus est dict. Mays despuys le borlet du milieu
jusques au borlet de la bouche & ilz l’amoindrissent d’une
ligne ou plus ou moings de chasque costé, prenant tousjours
leurs mesures avecq le compas despuys la ligne droicte qu’ilz font
au milieu du modelle en papier ou aultrement. Et ceste diminution
importe de sept ou huict quintalz de diminution & allegement pois,
et pour cela la piece n’en est pas moings seure. Cela se
pratique aulx grands pieces mays aulx gr petites pieces
despuys moindres que la moyene il fault observer la proportion cy devant
dicte & mener d’une ligne continuee la piece d’un bout à l’aultre.
Les tourillons sont communement à un pied du borlet du milieu
despuys tirant au bord de la culasse. Mays pource que
aulcuns canoniers ayment mieulx une piece qui poise sur le
devant pource que elle est plus aisée à braquer, pour ce faire
il ne fault qu’aprocher les tourillons plus prés de la culasse
& les esloigner du bord du milieu. Comme au contraire, si tu las
veulx rendre plus pesante sur le derriere, tu aprocheras les tourillons
du milieu de la piece ou les mettras par dessus tirant à la bouche.
Quand tu fores ta piece, tu fais une boicte de fonte canelée
comme une quenoille de lict, & fault qu’il y aye seze caneleures
ou encocheures dans lesquelles tu encocheras seze costeaulx bien
unis avec affin que tous ensemble trenchent & raclent de mesme
sorte. Pource que, que quelqu’uns ne tranchoient & racloient point,
il se feroict des chambres & des ondes dans le canon qui le
feroict estre costier & y auroict dangier que la piece ne se
coupast par le milieu. Pour eviter cela il fault que, despuys
la culasse jusques à la bouche, le foret passe uniment & que
l’ouverture de la piece soict despuys un bout jusques à l’aultre
uniment forée, pource que ainsy la pouldre s’en va tout à un
coup avecq plus de force. Au contraire, estant retenue, elle faict
costier & faict rompre la piece.