025v - - - - - Canonier
Au canon il y ha trois borlets celuy de la culasse celuy du milieu
celuy de la bouche Quand les fondeurs veulent pratiquer sur
leur besoigne ou rendre le canon ou aultre piece plus legere
& plus aisee a charrier il la font despuys le borlet de la culasse
iusques au borlet du milieu de la grosseur & proportion des
balles comme dessus est dict Mays despuys le borlet du milieu
jusques au borlet de la bouche & ilz lamoindrissent dune
ligne ou plus ou moings de chasque coste prenant tousjours
leurs mesures avecq le compas despuys la ligne droicte quilz font
au milieu du modelle en papier ou aultrement Et ceste diminution
importe de sept ou huict quintalz de diminution & allegement pois
Et pour cela la piece nen est pas moings seure Cela se
pratique aulx grands pieces Mays aulx grpetites pieces
despuys moindres que la moyene il fault observer la proportion cy devant
dicte & mener dune ligne continuee la piece dun bout a laultre
Les tourillons sont communement a un pied du borlet du milieu
despuystirant au bord de la culasse Mays pource que
aulcuns canoniers ayment mieulx une piece qui poise sur le
devant pource que elle est plus aisee a braquer Pour ce faire
il ne fault quaprocher les tourillons plus pres de la culasse
& les esloigner du bord du milieu Comme au contraire si tu las
veulx rendre plus pesante sur le derriere tu aprocheras les tourillons
du milieu de la piece ou les mettras par dessus tirant a la bouche
Quand tu fores ta piece tu fais une boicte de fonte canelee
comme une quenoille de lict & fault quil y aye seze caneleures
ou encocheures dans lesquelles tu encocheras seze costeaulx bien
unis avec affin que tous ensemble trenchent & raclent de mesme
sorte pourceque que quelquuns ne tranchoient & racloient point
il se feroict des chambres & des ondes dans le canon qui le
feroict estre costier & y auroict dangier que la piece ne se
coupast par le milieu. Pour eviter cela il fault que despuys
la culasse jusques a la bouche le foret passe uniment & que
louverture de la piece soict despuys un bout iusques a laultre
uniment foree pource que ainsy la pouldre sen va tout a un
coup avecq plus de force Au contraire estant retenue elle faict
costier & faict rompre la piece