023v - - - - - [continued]
Figure at left middle margin
pouldre. Estant pleine la saulssisse, trempe la bien dans
legierement pour mouller la toile, & non la pouldre, dans deulx
parties de vinaigre & de une d’eau de vye. Aprés laisse bien
seicher ladicte toile, et puys il fault joindre à ladicte
saulcisse une longue fisselle ou cordette qui soict plus
longue deux fois que la saulcice, & ne la fault pas
serrer contre la saulcice mays seulement la lier à icelle
par les deulx bouts & la couldre à la saulcice en
quelques endroicts sur le milieu. Aprés il fault oindre
toute la saulcice avecq de la tourmentine bien bonne,
et au bout d’icelle que tu vouldras joindre à la lumiere
du mortier pour donner foeu, tu pourras couldre une
ou attacher bien serré une liste de toile large d’un
empan qui soict aussy bien trempée dans la tourmentine;
& ceste liste doibt estre fendue par le milieu affin de
l’entourner & lier aultour du mortier, et fault l’atacher
en sorte que la lumiere soict pres du me la le bout de
la saulcice qui soict ouvert soict joinct à la lumiere du
mortier. Puys il fault mectre force pouldre accachée
sur la lumiere du mortier. Et aprés, que celuy qui est
hors du fossé tire la lignette & cordelle qui est joincte
à la saulcice tant qu’elle soict moyennement estendue, mays
non pas tant tirée qu’elle se destachast. Et s’il y
avoict de l’eau dans le fossé, il fauldra soubstenir
avecq des forchettes la saulcice. Puys celuy qui
tient le bout de la saulcice pourra donner foeu, s’estant
mis en seuretté & les aultres aussy.
Les mortiers qu’on veult poser aulx portes ou grilles de
fer sont suffisants s’ilz poisent 40 ou 50 lb. Au reste,
quand à la charge, balle, & façon de proceder, il fault faire
tout comme il est desja dict cy devant de celuy de 3 quintals.
Un homme le peult porter.
Il fault que la balle soict ronde d’un costé & platte de
l’aultre comme la moictié d’une balle couppée.
Il fault aussy que la croix se tienne à la balle et qu’elle,
la balle se fondant si tu la fais de metal, s’enveloppe
avecq le milieu de la croix.