023v - - - - - [continued]
Figure at left middle margin
pouldre Estant pleine la saulssisse trempe la bien dans
legierement pour mouller la toile & non la pouldre dans deulx
parties de vinaigre & de une deau de vye Apres laisse bien
seicher ladicte toile Et puys il fault joindre a ladicte
saulcisse une longue fisselle ou cordette qui soict plus
longue deux fois que la saulcice & ne la fault pas
serrer contre la saulcice Mays seulement la lier a icelle
par les deulx bouts & la couldre a la saulcice en
quelques endroicts sur le milieu Apres il fault oindre
toute la saulcice avecq de la tourmentine bien bonne
Et au bout dicelle que tu vouldras joindre a la lumiere
du mortier pour donner foeu tu pourras couldre une
ou attacher bien serre une liste de toile large dun
empan qui soict aussy bien trempee dans la tourmentine
& ceste liste doibt estre fendue par le milieu affin de
lentourner & lier aultour du mortier Et fault latacher
en sorte que la lumiere soict pres du me la le bout de
la saulcice qui soict ouvert soict joinct a la lumiere du
mortier Puys il fault mectre force pouldre accachee
sur la lumiere du mortier Et apres que celuy qui est
hors du fosse tire la lignette & cordelle qui est joincte
a la saulcice tant quelle soict moyennement estendue mays
non pas tant tiree quelle se destachassent Et sil y
avoict de leau dans le fosse il fauldra soubstenir
avecq des forchettes la saulcice Puys celuy qui
tient le bout de la saulcice pourra donner foeu sestant
mis en seurette & les aultres aussy
Les mortiers quon veult poser aulx portes ou grilles de
fer sont suffisants silz poisent 40 ou 50 lb Au reste
quand a la charge balle & facon de proceder il fault faire
tout comme il est desja dict cy devant de celuy de 3 quintals
Un homme le peult porter
Il fault que la balle soict ronde dun coste & platte de
laultre comme une demy balle la moictie dune balle couppee
Il fault aussy que la croix se tienne a la balle et quelle
la balle se fondant si tu la fais de metal senveloppe
avecq le milieu de la croix