021v - - - - - [continued]
Aultres posent deulx pals bien fichés en terre, de sorte
que l’un soict esgallement aussi distant du bort et de la gueule du
canon que l’aultre, et par dessoubs ilz possent la regle
susdicte. Puys, quand de nuict ilz veulent tirer, ilz poussent
leur canon droict vers la reigle & font que le bord de la
bouche se pose sur le bout de ladicte regle. Aprés ilz
mesurent avecq une regle ou semblable chose coupée de
mesure, despuys un pal jusques au costé du canon, & s’il
en est trop prés ou trop loing, ilz l’adjustent & font ainsy
du costé de l’aultre pal.
Pour desenclouer un canon
Aulcuns disent qu’on doibt oster la balle si le canon est chargé
& donner feu par la bouche du canon. Mays il est à croire
que le feu sortiroit plustost par là que d’aller chercher son
yssue par sa lumiere acoustumée, qui est enclouée & contrainte.
Le plus seur est que le canonier, qui volontiers est fondeur,
coigne & rive bien le clou que les ennemys ont mis, et avecq un
trepan fasse au costé une aultre lumiere au costé de celle qui
a este enclouée, ce qui sera faict en une heure. Et si avecq le
temps la violence de la pouldre faict derriver le clou dont
la piece est enclouée, tu feras un ancrou à la seconde lumiere
& y mettras un clou à vis bien justement, qui ne se deffera
jamays. M
Deffense d’une ville
Il n’y ha rien qui fasse plus d’execution à la deffence
d’une bresche que les mortiers qui sont disposés aulx
advenues des l’assault. Ilz portent beaucoup de munition.
be On les emplist de cloux de charrette, de gros dets
d’acier, bouts de chesne & choses semblables. Et quand
on sent les ennemys pres, on donne foeu à tous. Les
grenades aussy, bien faictes et jectées à propos, font
grand domaige. Et pour les empirer, on mect du verre
grossierement pillement pillé, ou dans les molles ou dans le
crusol, quand on les veult gecter, cela empire les blesseures.
Il ne fault pas que les grenades soient si aigres. Mays
il est bon qu’elles soient un peu alliées de la matiere des
pieces affin que, tenant un peu coup plustost que se rompre,
elles ayent plus de violence.