021v - - - - - [continued]
Aultres posent deulx pals bien fiches en terre de sorte
que lun soict esgallement aussi distant du bort et de la gueule du
canon que laultre Et par dessoubs ilz possent la regle
susdicte Puys quand de nuict ilz veulent tirer ilz poussent
leur canon droict vers la reigle & font que le bord de la
bouche se pose sur le bout de ladicte regle Apres ilz
mesurent avecq une regle ou semblable chose coupee de
mesure despuys un pal jusques au coste du canon & sil
en est trop pres ou trop loing ilz ladjustent & font ainsy
du coste de laultre pal
Pour desenclouer un canon
Aulcuns disent quon doibt oster la balle si le canon est charge
& donner feu par la bouche du canon Mays il est a croire
que le feu sortiroit plustost par la que daller chercher son
yssue par sa lumiere acoustumee qui est enclouee & contrainte
Le plus seur est que le canonier qui volontiers est fondeur
coigne & rive bien le clou que les ennemys ont mis et avecq un
trepan fasse au coste une aultre lumiere au coste de celle qui
a este enclouee ce qui sera faict en une heure Et si avecq le
temps la violence de la pouldre faict derriver le clou dont
la piece est enclouee Tu feras un ancrou a la seconde lumiere
& y mettras un clou a vis bien iustement qui ne se deffera
iamays M
Deffense dune ville
Il ny ha rien qui fasse plus dexecution a la deffence
dune bresche que les mortiers qui sont disposes aulx
advenues des lassault ilz portent beaucoup de munition
be on les emplist de cloux de charrette de gros dets
dacier bouts de chesne & choses semblables Et quand
on sent les ennemys pres on donne foeu a tous Les
grenades aussy bien faictes et jectees a propos font
grand domaige Et pour les empirer on mect du verre
grossierement pillement pille ou dans les molles ou dans le
crusol quand on les veult gecter cela empire les blesseures
Il ne fault pas que les grenades soient si aigres Mays
il est bon quelles soient un peu alliees de la matiere des
pieces affin que tenant un peu coup plustost que se rompre
elles ayent plus de violence