021r - - - - - Canonier
Aulx petites pieces qui ne se chargent poinct avec lanterne, on
charge de pouldre jusques à l’escusson, qui se pose sur la piece avecq
deue proportion.
Pour poincter ung canon, c’est à dire prendre sa visée, il fault plustost
prendre la lumiere, c’est à dire viser, par les costés que par le hault,
sçavoir est au dessus du canon. Car mirant par le dessus tu pourras
bien trouver la ligne tendant à ton but, mays tu ne trouverois pas
si le canon tend plus à un costé qu’à aultre. Prens doncq ta lumiere
par un costé puys par l’autre, & adjouste ta piece au poinct que tu
mire. Puys prens ta lumiere par le dessus de la culasse, ce qui
sera bien tost faict. Aprés fais à ta discretion baisser un peu
ta piece si tu es en distance de vraye portée, pour ce que la force
de la pouldre faict communement haulser. Mays si tu estois
esloigné plus que ta piece ne tire de poincte en blanc, il te fauldroit
considerer que la poisanteur de la balle feroit baisser.
Pour tirer de nuict d’un canon
Aulcuns tiennent leurs pieces chargées Et de jour. Puys,
affin que le canonnier puysse tirer à la bresche où peult estre
les assaillis reparent, les assiegeants donnent une faulse
alarme affin que les assiegés jectent dans les fossés ou
aultour de la bresche des flambeaulx & foeus artificiels,
ausquels le canonier mire. Quelques fois par reverberation
de mirouers ou de bocals pleins deau, les assaillans font
lumiere à la bresche. Le moyen que tu sçais du cadran &
ligne à plomb est bien fort bon. Aultres font clouer avecq
fortes chevilles de fer deulx ou trois rengs de tables sur la
platteforme de bois faicte pour mectre le canon en batterie.
Et laissent des coches vuides par où les roues du canon
puissent passer justement. Et par ce moyen tu le poseras
tousjours à te semblable q poinct qu’il n’inclinera poinct
dadvantaige à droicte qu’à la gaulche. Et affin qu’il ne soit
ne trop hault ne trop bas, quand tu tires de jour tu poses
une regle bien fichée en terre qui vienne justement à toucher par
bas le bort du canon aprés qu’il est poincté, & adjouste pour tirer.
at left bottom margin
Si la platteforme,
les roues ou les
coings se rompent
ou desbauchent,
ceste invention n’est
pas de proffict.