020v - - - - - Blanchir la face
Pille de la vesse en eau de cisterne & non aultre, & de ceste
eau blanchie lave. Cella est estimé fort singulier. Et croy
qu’en fayre de l’amydon & en user seroict encores mieulx.
Contre les ventosités, colique, &c
Le suc exprimé de lescorce d’orenge ou l’eau distilée de l’escorce d’orenge
est excellent contre la colique venteuse. L’escorce aussi
confite est excellente pour les vents de l’estomac. Et pour
en faire preuve, ayant versé du vin escumant dans un
verre, exprime du jus d’orange sur l’escume du vin, qui
ne provient que de vapeur & vent, et tu verras qu’incontinent
l’escume s’esperdra. Si tu exprimes aussi du just contre la
chandelle, elle ardra d’advantaige.
Eschervis racine
Ils veulent estre plantés en lieu fort humide ou tel qu’avecq
puys rodier ou fontayne on le puysse souvent arroser, car
par ce moyen ilz sont tendres. Aultrement ils se faict au dedans
un coeur dur qui luy oste toute sa bonté.
Contre brusleure
Pile un oignon avecq du verjus & le laisse ainsy tremper
puys l’aplique. Ou bien aplique sur la brusleure du savon
noir. Experimenté.
Commun dire
Clocher de Rhodés, eglise d’Alby, cloches de Mende.
Touteffoys on tient la cloche de Tholose appellée Cardaillac pour
une des plus belles de France, d’aultant qu’il poise deuls cens
cinquante quintals.
Forme de regime
Chasque matin prens deulx ou trois oeufs ponds d’un ou
deulx jours. Fais les chaufer jusques & non cuire. Prens les
moyeulx bien saulpouldrés de sucre, et aprés bois un doigt
de vin. Et oultre ce que cela est nourrissant, il faict bon ventre.