Making and Knowing
A minimal edition of BnF Ms Fr 640

[TOC] | [translation]

- - - - - folio image: 020v - - - - -

Blanchir la face

Pille de la vesse en eau de cisterne & non aultre & de ceste
eau blanchie lave Cella est estime fort singulier Et croy
quen fayre de lamydon & en user seroict encores mieulx

Contre les ventosites colique &c

Le suc exprime ou leau distilee de lescorce dorenge
est excellent contre la colique venteuse Lescorce aussi
confite est excellente pour les vents de lestomac Et pour
en faire preuve Ayant verse du vin escumant dans un
verre Exprime du jus dorange sur lescume du vin qui
ne provient que de vapeur & vent Et tu verras quincontinent
lescume s’esperdra Si tu exprimes aussi du just contre la
chandelle elle ardra dadvantaige

Eschervis racine

Ils veulent estre plantes en lieu fort humide ou tel quavecq
puys rodier ou fontayne on le puysse souvent arroser Car
par ce moyen ilz sont tendres Aultrement ils se faict au dedans
un coeur dur qui luy oste toute sa bonte

Contre brusleure

Pile un oignon avecq du verjus & le laisse ainsy tremper
puys laplique Ou bien aplique sur la brusleure du savon
noir
experimente

Commun dire

Clocher de rhodés Eglise dAlby cloches de mende
Touteffoys on tient la choche de tholose appellee cardaillac pour
une des plus belles de france daultant quil poise deuls cens
cinquante quintals

Forme de regime

Chasque matin prens deulx ou trois oeufs ponds dun ou
deulx jours fais les chaufer jusques & non cuire prens les
moyeulx bien saulpouldres de sucre Et apres bois un doigt
de vin Et oultre ce que cela est nourrissant il faict bon ventre