020r - - - - - @Pour faire les millas
Il fault faire fraiser du millet pour en tirer la croutte, et puis le
netoyerés bien. Aprés il fault le remouldre bien delié et le passer par
ung cedar bien delié. Ce faict, il fault detremper la farine avec du
beurre frais fondu et du laict, et qu’il y ait aultant d’ung comme d’aultre,
de maniere qu’il soit fort clair, comme pate pour faire bignetz. Et y
mettrés des jaulnes d’oeuf selon la quantite de la farine, de sorte
qu’il revienne deux jaulnes d’oeuf pour chaique millas. Puis y mettrés
du safran si vous voulés, pour leur donner ung peu de couleur.
Il fault aprés avoir des moulles, et fault qu’il soient de terre,
de la façon d’ung fons de chappeau à la catholicque, mais il
fault qu’il soit ouvert par les deux boutz. Et puis ayant faict
bon feu, vous nettoyerés la place du fouyé où vous voulés
mettre voz millas, et puis vous prandrés vos moulles et les gresserés
bien fort affin que la pate ne se tienne pas quant elle sera cuitte.
Ayant faict cela, vous mettrés voz dictz moules sur la place du fouyé
bien nettoyée, et mettrés ung peu de farine au fondz, et les
emplirés de la pate cy dessus dicte. Aprés vous couvrirés les
dictz moules d’ung couvercle, qui sera faict comme le moulle mais
Il fault qu’il soit plus grand, et qu’il ne soit pas ouvert
par dessus. Puis, ayant faict cela, vous mettrés ung peu de foin
sur le dict couvercle et force rachaulx, et y ferés bon feu
tout autour de charbon. Cela faict, vous en descouvrirés
ung de là à peu de temps, et verrés quant il sera cuit, il
faudra qu’il soit dur.
@Vitrier
Le verre de Lorraine est plus plain & plus uny que le verre
de plat et plus fort & de plus de durée. Mays communement il est
tasché par venes comme lignes droictes comme tanées, ce qui advient
pource que les verriers, l’ayant faict, le mectent tout chault
sur la paille, qui le tache de ceste sorte. Cela neantmoings
s’efface avecq du vernis & du sel & aultres drogues que les
vitriers y mettent. Le verre de Lorraine se vent à lien &
à chasque lien il y a trois tables. Le lien coste communement x sous.
Le verre de plat se vent en faict en France_(,) il est plus blanc & plus clair,
mays il n’est pas aussy de telle durée que le Lorrain. Il est aussy communement
envellé & pour ceste occasion il est meilleur à faire petites losanges que
grandes pieces quarrées en forme de chassis, pource que elles ne se peuvent bonnement
bien assoir uniment.
at left bottom margin
Le verre de plat
se vent à paniers.
Le panier contient
24 plats, qui se
vendent communement
x ou douze lb.