020r - - - - - @Pour faire les millas
Il fault faire fraiser du millet pour en tirer la croutte Et puis le
netoyeres bien apres Il fault le remouldre bien delie Et le passer par
ung cedar bien delie ce faict Il fault detremper la farine avec du
beurre frais fondu et du laict Et quil y ait aultant dung comme dautre
de maniere quil soit fort clair comme pate pour faire bignetz Et y
mettres des Jaulnes doeuf selon la quantite de la farine de sorte
quil revienne deux Jaulnes deouf pour chaique millas puis y mettres
du safran si vous voules pour leur donner ung peu de couleur
Il fault apres avoir des moulles Et fault quil soient de terre
de la facon dung fond de chappeau a la catholicque mais Il
fault quil soit ouvert par les deux boutz Et puis ayant faict
bon feu vous nettoyeres la place du fouyé ou vous voules
mettre voz millas Et puis vous prandres voz moulles et les gresseres
bien fort affin que la pate ne se tienne pas quant elle sera cuitte
ayant faict cela vous mettres voz dictz moules sur la place du fouye
bien nettoyee Et mettres ung peu de farine au fondz Et les
emplires de la pate cy dessus dicte apres vous couvrires les
dictz moules dung couvercle qui sera faict comme le moulle mais
Il fault quil soit plus grand Et quil ne soit pas ouvert
par dessus puis ayant faict cela vous mettres ung peu de foin
sur ledict couvercle Et force rachaulx Et y feres bon feu
tout au tour de charbon cela faict vous en descouvrires
ung de la a peu de temps Et verres quant Il sera cuit Il
faudra quil soit dur
@Vitrier
Le verre de lorraine est plus plain & plus uny que le verre
de plat et plus fort & de plus de duree Mays communement il est
tasche par venes comme lignes droictes comme tanees ce qui advient
pourceque les verriers layant faict le mectent tout chault
sur la paille qui le tache de ceste sorte Cela neantmoings
sefface avecq du vernis & du sel & aultres drogues que les
vitriers y mettent Le verre de lorraine se vent a lien &
a chasque lien il y a trois tables le lien coste communement x sous
Le verre de plat se vent en faict en France il est plus blanc & plus clair
mays il nest pas aussy de telle duree que le lorrain Il est aussy communement
envelle & pour ceste occasion il est meilleur a faire petites losanges que
grandes pieces quarrees en forme de chassis pourceque elles ne se peuvent bonnement
bien assoir uniment
at left bottom margin
Le verre de plat
se vent a paniers
Le panier contient
24 plats qui se
vendent communement
x ou douze lb