016v - - - - - [continued]
qui est communement de la haulteur de d trois pans & fera bien
recuire le. Mays premierement il fault que tu ayes faict recuire ton
fourneau avecq avecq quelque peu de gros charbons, de sorte que
le fonds soict rouge. Et lors tu y mectras la charge de
charbon, au milieu duquel tu mectras ton fer, non pas tout au coup
mays dix ou quinze lb. a chasque fois. Et comme celuy sera avallé
& au fonds du fourneau, remects en tousjours aultant. Et charge
de trois ou quattre palles de charbon nouveau, qui soict du plus
gros & remoillé affin qu’il aye plus de chaleur & ne se gaste pas
si tost. Et quand tu cognoistras que ton fourneau sera plein de
matiere, comme de deulx quintals ou de moings si tu n’en en pas tant,
tu laisseras consomer le charbon de soy mesme. Et comme le charbon
sera comme abatu au ras du fourneau, tu pourras couler dans
des moules & coquilles de fer ou de metail, qui est encore meilleur
pource que un fer s’attaque a l’aultre. Et fault que le dedans des
moules soient bien cendrés avecq de la cendre destrempée, affin
qu’il ne s’arrape pas.
Contre Gonorrhée
Destrempe de la graine de coings en eau claire, & de cette eau
mucilagineuse fais injection.
Pour oster le menu poil du front
Ayes une aiguillée de soye deliée & la passe serré sur les endroits
du poil & il s’attaquera à la soye comme menus brins de cotton.
Soye
Le cramoisi habonde plus que toutes les aultres soyes pource que
sa couleur ne charge poinct comme ne faict le bleu & le vert qui
aussi revienent a meilleur compte a l’ouvrier. Le noir abonde
moings pource qu’il charge fort.
Garder oranges
Il les fault choisir bien entieres, sans estre machées, & les mectre
et en emplir un vaisseau d’estaing et bien clos & elles se garderont
six mois.
Chandelles
Elles se gardent bien dans le son qui les faict blanches & de
bonne durée, ce disent aulcuns. Touteffois je croy que c’est asses de
les tenir en lieu frais & sec de telle sorte qu’elles ne sont point pressées.
Il est mieux que parmy le lumignon il y aye un fil de chanvre, qui luy donne
plus de clarté & faict tenir le lumignon plus droict. Aultrement s’il est tout de
cotton, comme font ceulx de Montauban, il le fault moucher souvent car, aprés qu’il
ha un peu bruslé, il le cotton s’abaisse & faict desgouter la chandelle.