016v - - - - - [continued]
qui est communement de la haulteur de d trois pans& fera bien
recuire le Mays premierement il fault que tu ayes faict recuire ton
fourneau avecq avecq quelque peu de gros charbons de sorte que
le fonds soict rouge et lors tu y mectras la susdicte charge de
charbon au milieu duquel tu mectras ton fer non pas tout au coup
Mays dix ou quinze lb a chasque fois Et comme celuy sera avalle
& au fonds du fourneau remects en tousjours aultant Et charge
de trois ou quattre palles de charbon nouveau qui soict du plus
gros & remoille affin quil aye plus de chaleur & ne se gaste pas
si tost Et quand tu cognoistras que ton fourneau sera plein de
matiere comme de deulx quintals ou de moings si tu nen en pas tant
Tu laisseras consommer le charbon de soy mesme Et comme le charbon
sera comme abatu au ras du fourneau Tu pourras couler dans
des moules & coquilles de fer ou de metail qui est encores meilleur
pourceque un fer sattaque a laultre Et fault que le dedans des
moules soient bien cendres avecq de la cendre destrempee affin
quil ne sarrape pas
Contre Gonorrhee
Destrempe de la graine de coings en eau claire & de cette eau
mucilagineuse fais injection
Pour oster le menu poil du front
Ayes une aiguillee de soye deliee & la passe serre sur les endroits
du poil & il sattaquera a la soye comme menus brins de cotton
Soye
Le cramoisi habonde plus que toutes les aultres soyes pourceque
sa couleur ne charge poinct comme ne faict le bleu & le vert qui
aussi revienent a meilleur compte a louvrier Le noir abonde
moings pourcequil charge fort
Garder oranges
Il les fault choisir bien entieres sans estre machees & les mectre
& en emplir un vaisseau destaing et bien clos & elles se garderont
six mois
Chandelles
Elles se gardent bien dans le son qui les faict blanches & de
bonne duree ce disent aulcuns Touteffois je croy que cest asses de
les tenir en lieu frais & sec de telle sorte quelles ne soient point pressees
Il est mieulx que parmy le lumignon il y aye un fil de chanvre qui luy donne
plus de clarte & faict tenir le lumignon plus droict Aultrement sil est tout de
cotton comme font ceulx de montauban il le fault moucher souvent car apres quil
ha un peu brusle il le cotton sabaisse & faict desgouter la chandelle