016r - - - - - Fonte de fer doux
Le commun estime que le fer une fois fondu ne se peult refondre pourceque
ilz ne le chaufent qua petites forges ou il ne faict que prendre ignition
Les alchemistes se promectent de le faire fondre avecq du realgar ou du
plomb ou de lorpiment mesle Mays sans tout cela Aulcuns ont trouve
la maniere de le faire fondre non seulement le fer aigre comme celuy de pots
de fer Mays le fer douls comme d celuy de gueuse & de barre qui est le plus
malaise Et pour cet effect ilz font un fourneau en ceste sorte qui ha un
pan & demy de large & un pan & demy dedeulx pans de profond Et la
tuelle qui est le canon par marque A par ou les tuyaulx des souflets semboictent
doibt estre posee au milieu de la profondeur du fourneau de sorte
quil y aye un pan de gueule de four sur la tuelle & un pan dessouls
at left top margin
Chasque pan
de gueule de four
en quarre contient
quintal & demy
& le pan du fourneau
rond en tient deulx
quintals
Figure at left middle margin
at right middle margin
Les minerons pour fayre
courre le fer mectent a la
bouche de leur fonte deulx ou
trois poignees dhiebles comme ilz
veulent faire courre la fonte
Et cela rend le fer merveilleusement
ductible & courant
Il fault aussy que la tuelle entre jusques au milieu de la gueule du fourneau
qui est un poinct principal du secret pourceque le vent vient a fraper sur le
bord & muraille qui faict le ventre du fourneau & par ce moyen se repand
esgallement par tout & en hault comme la flamme dans un fourneau de
reverberation & parce moyen eschaufe beaucoup plus Car si le vent battoit
a plomb la matiere fondue ou preste a se fondre il la refroidiroict &
empescheroit de courre & de se fondre Il fault aussy que les souflets
soict conduicts par le sault & cours de leau comme aulx forges pourceque en
ceste sorte les souflets vont par mesure & compas & dune grande vistesse
Ce que ne pourroit f pas faire la force des ouvriers On dresse doncq
la muraille comme tu vois & le fourneau a la superficie de la terre Au
bord duquel tu fais une fosse comme aulx aultres fontes Affin de mectre
les moules de ce que tu veulx gecter & pour ce faire tu destouppes le pertuis
que tu avois fais au fonds du fourneau pour faire couler la matiere
fondue Tu y pourras fondre deulx quintals de fer a chasque fois
Et pource faire tu choisiras le plus gros charbon que tu pourras trouver
& en poses une charge au fonds sur le plan et superficie du four & le
bas amoncellant en hault comme en poincte jusques au hault de la muraille
at left bottom margin
Aulcuns font
un moule du
calibre de la
piece & le trempent
puys y frappent
un loppin de fer
doulx couppe de
mesure & comme
ce loppin est bien
rouge ilz le
frappent dans le
moule & larrondissent
avecq une grosse
lime Estimant
ces balles estre
plus fortes que
les fondues qui
estant aigres
sont plus subgectes
a rompre
[continued]