015v - - - - - Tablettes
Il s’en faict de buys marquetées d’ebene, sandal, yvoire ou d’or
et d’argent comme damasquine. Puys on y escript avecq une poincte
d’argent, et aprés on l’efface avecq de l’os de seiche, les en frottant.
Lettre plus lisable
On taille les plus grandes pieces de beril ou cristal en rond
d’un costé & de plat par l’aultre, puys on l’enchasse avecq un
petit manche et on assoict le costé plat sur la lettre.
Stamper
Si tu as quelque medaille de bronze & que tu la veuilles
fayre fort legere, fais en un cave de plomb, puys estands
sur iceluy du clinquant ou des lames de plomb ou d’argent
recuit recuit & pose ta medaille de bronze dessus & frappe avecq
un mail de bois.
Ramolir la corne
Ceulx qui acou mectent en œuvre les agnus dei & font des cercles
de corne pour certaines petites boictes ramolissent ladicte lesdicts
cercles les mectant seulement tremper dans l’eau chaulde & les façonnent aprés
sur un triboulet en rond ou faict en ovale.
Oreilles
Quand quelque defluxion y vient, il se fault bien garder d’y rien
mectre dedans, et selon le proverbe à l’oeil & à l’oreille il n’y fault
toucher que du coulde. Touteffois à l’oreille affectée est bon de mectre
du cothon musqué, c’est à dire tenu parmy du musc, car il conforte
bien fort.
Mal des dents
Aulcuns mectent une gousse d’ail dans l’oreille qui est
du costé que la dent faict mal, & en deux ou trois heures
ilz s’en trouvent bien. Aultres mectent dans la narine
qui est du costé de la dent qui deult de la peau verte
raclee deu serment de bisaube, sçavoir celle qui est soubs
la grise qui semble sarment.