015r - - - - - Drap damasse
Tu peulx damasser un drap de deux differentes couleurs
et imiter la broderie sans adjouster aulcune chose a iceluy en ceste
sorte Comme il est tainct en jaulne ponce dessus tel patron quil te
plaira puys tu faulfileras de la fisselle ou plus grosse cordette
sur le poncis et le boutte en la teincture de guesde ou pastel & il
se fera vert hormis ce qui est dessoubs la fisselle qui demourera
jaulne a cause que la taincture verte ny aura poinct penetre Ainsy
pourras tu fayre des aultres couleurs Et au lieu de corde ou fisselle
adjoustes sur la premiere couleurs des pieces de meschant drap taillees
en forme de moresque En ceste sorte tu auras de la broderie abon
marche
Gecter en fonte
On gecte les chandeliers et petits ouvraiges en chassis avecq
du sable Et apres avoir emprainct louvraige on le saulpouldre
de farine affin de mieulx faire courre lae metal cuivre ou letton
Quand le sable a servi un moys il en fault prendre de recent
pourceque celuy qui a servy se recuisant au feu+ se desseiche &
perd sa lyaison Touteffois il sert a mesler parmy le nouveau
car il faict que la besoigne ne soufle pas tant On gecte en terre
les grands ouvraiges comme artiglerie cloches & choses semblables
& le cuivre gecte en terre ne faict pas tant de chappe et est plus
blanc que celuy qui est gecte en sable La terre est ardille sabloneuse
meslee de fiente de cheval & de bourre Celle qui est a servi a la fonte
qui est noire cuicte & comme bruslee se gecte mesle parmy les sables
artificiels & est fort bonne / pour adoulcir & faire courre le cuivre on y
gecte estant fondu un peu de plomb qui ne salie pas mays se trouve a la
superficie du gect
at left middle margin
+
a la chaleur
du metal fondu
Gecter or et argent
Il fault que le sable soict de chose fort seiche & aride & bien
recuite au chassis car si elle estoit humide comme le sable des
fondeurs lor ou largent saulteroient & porteroient dommaige Il est
besoing aussy que la terre suppe le metal Car lor ou largent gecte
est se rend fort spongieulx cest pourquoy il le fault rebattre aultrement
il est frangible comme on voict aulx manches de cuilleres