014r - - - - - Pour murailles de terre et bastiment rustique
Les hirondelles nous ont aprins ce mestier, faisant leurs nids
de boue meslée, pour avoyr liaison, avecq des festus & brins de
foing ou de paille. Es lieulx doncq où la pierre & la brique manque,
on ce peult ayder de terre à faire paroy & muraille. En quoy la
terre legiere, qui ne faict poinct de mottes estant labourée, ains qui est
comme entremeslée d’arene, tient le premier rang pource que elle se
bat & tapit mieux. Il est vray qu’il la fault humecter & la avecq la
pelle baisse la coupper en forme de gasons, et ainsi la poser &
disposer. Ceste cy dure d’advantaige et n’y a pas tant de façon,
et ne la seicheresse ne la faict poinct fendre & crevasser. Mays
pource que il ne se trouve pas partout de semblables terres, ceulx
qui sont en bon & fertile territoire, ayants designé avecq le cordeau
les largeur & longueur de leurs fondements, fichent en terres sur le
bord d’iceulx d’une part & d’aultre de grands ch perches & ou chevrons
pour apuyer des tables entre lesquelles ilz gectent la terre, faisant
chasque couche d’un pied ou environ, l’entremeslant comme S.S.S de
branches de bruyeres ou semblables choses, puys avecq trois formes
de battouers l’appillent & la battent. L’un s’appelle le mail, qui
est en forme triangulaire comme A, et de cestuy on appille premierement la
terre. Aprés on ce sert d’un qui est de billots poinctus par le bout &
emmanchés à un gros baston, & cestuy est pour bien presser la terre
aux extremités et bords de la muraille qui adhære aux tables, & s’appelle . L’aultre s’appelle la batte, qui est pour aplanir & battre la terre
pour la derniere foys, ainsy qu’il appert par .C. Puys on faict
un aultre couche de terre & bruiere et on la bat comme est dict, & ainsy on continue
jusques à ce que la muraille est parfaicte, laquelle on couvre de
bruyeres & puys de terre. Aulcuns m entremeslent en ladicte muraille
des rengs de brique. Ils font aussi la muraille en talluant,
donnant a largeur aux fondements selon qu’on veult haulsser
la muraille. Laquelle estant vielle blanchist & par là demonstre
qu’il y a du salpestre. C’est pourquoy, quand elles tumbent, les
pouldriers en font leur proffict
Figure at left bottom margin
