013v - - - - - [continued]
passeroit pas si bien. Mays choisis pour cet effect la soye crue
jaulne & naturelle pource qu’elle est plus forte & rejecte la
farine comme le poil de cheval.
Pour cognoistre la bonne
cendrée d’azur à huile
Celle qui s’amoncelle en pettites mottes et est grumeleuse
est la meilleure car elle est plus subtille. Celle qui est aussy fort
palle de couleur pour ce que l’huile l’obscurcist. Quelques
sophistiqueurs les meslent, mays tu cognoistras cela si
tu en verses sur un papier & l’acaches & l’estens avecq le
doigt pource que si elle est meslée elle se trouvera diverse &
comme rayée d’une palle & d’une plus obscure, mays si elle
est entiere elle sera unie & d’une couleur.
Blanchiment de perles
Quand elles ont esté apliquées en broderie sur quelque
acoustrement, elles sont grasses & se nettoyent en eau de savon.
Crapaudine
Celle qui est de la teste du crapault & qui ha la figure
du crapault naturellement paincte comme tu as veu est la plus
excellente. On tient que si on mect de la pouldre d’icelle sur
un brasier en la chambre de quelques uns de nuict, qu’ilz
ne pourront se mouvoir ne parler ne donner empeschement
aulx larrons.
Serpens
On dict que si on nomme en grec un serpent disant ΟΦΗ
ΟΦΗ, qu’il s’enfuyra. Comme si en grec on nom appelle un
pourceau y ïon, qu’il viendra.
Chandelles
Jamays les chandeliers ne font bonne chandelle lorsque
le vent d’haultan soufle pource qu’elle est tousjours fondante,
quelque bon suif qu’ilz y employent.