012v - - - - - Mouler le stuc promptement
Broye & pulverise subtilement de la brique ou bol
armen ou sanguine & l’incorpore avecq cire fondue,
& ainsy fondu jecte comme des aultres sur une medaille
de relief, & ainsy tu auras un cave où tu pourras
gecter du plastre, papier pilé ou terre chimolée.
at left top margin
La brique bien
subtilement tamisée
est meilleure car le
bol est trop gras
Nettoyer perles jaulnes
Fais les doulcement bouillir dans la bouteure d’orfevres
puys, avecq du tripoly & un lopin de cuir saulpouldré
du costé de la chair de la pouldre dudict tripoly, frotte
& polys la perle.
Pour blanchir enilanroc
Aulcuns pensent que la crouste de couleur de ceruse qui
est dessus soict naturelle, aultres disent que c’est un secret
des anciens lapidaires qui s’est perdu, aultres disent que c’est
esmail recuit. Et par le moyen de la dicte crouste, plusieurs
chifres, lettres, cercles st & aultres bisarries se peuvent former.
Quand au moyen, je l’ay practiqué ainsy. J’avoys une fois
volonté de luy donner une couche d’arsenic broyé sur le mabre.
Touteffois, je l’experimentay sans iceluy, et mis la chose susdicte
enilanroc dans une petite cassete de fer au feu de ma forge d’orfevre
avecq trois ou quattres petits charbons à demy bruslés, et ne souflay
qu’avecq la bouche. Et touteffois la chose vint à rougir & prendre
ignition & se fit toute blanche, non seulement en la superficie mays
par dedans, & lors je la laissay de soy mesmes refroidir pres
du feu car aultrement, l’exposant tout à coup à l’air froict, elle se
fust esclatée. Estant toute blanche, je la passay par ma roue
de plomb d’estaing, où je la trouvay aussy dure qu’auparavant, & descouvrant
un peu le blanc, je la trouvay de couleur de carnation candide.
Enfin je la polis & vis qu’elle prenoit fort beau poliment &
se pouvoict paragonner à une fort belle agathe pour en tailler
quelque beau visaige & le raporter sur la une table d’une
[continued]