012r - - - - - Pour mouler de soufre
Le soufre se faict beau avecq le noir à noirci meslé ou
avecq sanguine pulverisée, qui le rend plus dur et plus fort.
L’ayant bien laissé fondre jusques à ce qu’il soict liquide
comme huile, y meslant du verdegris, tu m en gecteras dans
le plastre, un lesard ou aultre chose, fort nette.
at left top margin
Il ne le fault pas gecter
qu’il ne soict bien refroidi
& qu’il n’aye perdu toutes
ses pustules & bouillons,
et ne soict bien
abaissé & rendu
uny comme eau.
Le noir à noircir
luy donne un beau
vernis & le rend
plus necte. Il fault
employer le soufre
jaulne du plus beau,
car le grisastre & vif
n’est pas bon. Ne gecte pas
au vent & au froict
car il soufleroit.
Chimolée
La terre chimolée, aultrement des parayres qui acoustrent
les draps, est excellente à mouler en creulx ou relief, & si
tu la veulx recuire, il fault que premierement elle soict
chaulde, & la recuire à feu doulx de loing & peu à peu,
aultrement elle petteroit. Mects la figure à recuire dans
un pot au four, ou dans un four couvert. Elle est fort
doulce, nette & belle. Tu peulx faire cave d’animaulx de chimolée
& i gecter du plomb.
at left middle margin
Il fault que l’ouvraige
soict sec de 4 ou 5
jours plustost que
le recuire.
Quand tu moules
& fais cave de
chimolée, ne presse
pas à coup mays
doulcement, car elle se
fendroit.
Papier
Le plus blanc & plus fin est le meilleur. Et quand le cave
est bien nect, comme de soufre ou chimolée cuitte, il se faict fort
nect. Tu luy peulx donner une couche ou deulx de blanc avecq
un bort d’or pour imiter l’albastre. Et aprés que tu l’as
couché le blanc, tu le peulx brunir avecq la dent. Mays
affin qu’il se brunisse, il fault destremper le blanc de plomb
avecq glaire d’oeuf & pelure de figuier. Ou pour mieulx,
vernis ton ouvrage de vernis blanc. Quand tu moules aussi
de papier, comme il se commance à seicher, brunis par derriere avecq
la dent.
Plastre
Celuy de montaigne est plus gris et le celuy d’Albigeois plus
blanc. Il le fault cuire à feu clos comme à feu de reverberation,
ou fours de barbiers. Et le plus frais cuict est le meilleur à
mectre en besoigne. Il le fault broyer subtillement sur le mabre.
Aprés avoyr præparé ton cave de soufre ou aultre & l’avoir
huilé & entourné d’un cercle, destrempe non trop espés ton plastre en
eau & desmelle bien avecq le doigt, et s’il faict des pustules, jectes y dessus
de la pouldre dudict plastre & broye avecq le doigt jusques à ce +
at left bottom margin
+qu’il ne fasse plus
de pustules. Puys
gecte & saulpoudre
derechef de pouldre
de plastre &
laisse bien
prendre, puys
rascle la
pouldre.