Making and Knowing
A minimal edition of BnF Ms Fr 640

[TOC] | [translation]

- - - - - folio image: 012r - - - - -

Pour mouler de soufre

Le soufre se faict beau avecq le noir a noirci mesle ou
avecq sanguine pulverisee qui le rend plus dur et plus fort
layant bien laisse fondre jusques a ce quil soict liquide
comme huile / y meslant du verdegris tu m en gecteras dans
le plastre un lesard ou aultre chose fort nette

at left top margin

Il ne le fault pas gecter
quil ne soict bien refroidi
& quil naye perdu toutes
ses pustules & bouillons
et ne soict bien
abaisse & rendu
uny comme eau
Le noir a noircir
luy donne un beau
vernis & le rend
plus necte Il fault
employer le soufre
jaulne du plus beau
car le grisastre & vif
nest pas bon Ne gecte pas
au vent & au froict
car il soufleroit

Chimolee

La terre chimolee aultrement des parayres qui acoustrent
les draps est excellente a mouler en creulx ou relief & si
tu la veulx recuire il fault que premierement elle soict
chaulde & la recuire a feu doulx de loing & peu a peu
aultrement elle petteroit mects la figure a recuire dans
un pot au four ou dans un four couvert Elle est fort
doulce nette & belle @Tu peulx faire cave danimaulx de chimolee
& i gecter du plomb

at left middle margin

Il fault que louvraige
soict sec de 4 ou 5
jours plustost que
le recuire
Quand tu moules
& fais cave de
chimolee ne presse
pas a coup mays
doulcement car elle se
fendroit

Papier

Le plus blanc & plus fin est le meilleur Et quand le cave
est bien nect comme de soufre ou chimolee cuitte il se faict fort
nect Tu luy peulx donner une couche ou deulx de blanc avecq
un bort dor pour imiter lalbastre Et apres que tu las
couche le blanc tu le peulx brunir avecq la dent Mays
affin quil se brunisse il fault destremper le blanc de plomb
avecq glaire doeuf & pelure de figuier ou pour mieulx
vernis ton ouvrage de vernis blanc Quand tu moules aussi
de papier comme il se commance a seicher brunis par derriere avecq
la dent

Plastre

Celuy de montaigne est plus gris et le celuy dalbigeois
plus blanc Il le fault cuire a feu clos comme a feu de reverberation
ou fours de barbiers Et le plus frais cuict est le meilleur a
mectre en besoigne Il le fault broyer subtillement sur le mabre
Apres avoyr præpare ton cave de soufre ou aultre & lavoir
huile & entourne dun siecle destrempe non trop espes ton plastre en
eau & desmelle bien avecq le doigt et sil faict des pustulles jectes y dessus
de la pouldre dudict plastre & broye avecq le doigt jusques a ce +

at left bottom margin

+ quil ne fasse plus
de pustulles puys
gecte & saulpoudre
derechef de pouldre
de plastre
&
laisse bien
prendre puys
rascle la
pouldre