011v - - - - - Couleur dacier de damas sur costeaulx
Frotte d’eau fort commune l’acier, meslant avecq ladicte eau de
la terre, & aprés frotte le tout avecq de la cendre
ou sable, & l’or touchera & l’argent comme sur une pierre de touche.
Pour oster la rougeur des yeulx ou la meurtrisseure
Fays deulx petites leches deliées de cher de mouton cru, &
avecq un bandeau aplique la nuict sur les yeulx.
Pour coucher d’or mat
Il n’y a rien mieulx que le vernis noir des espasiers pour en
faire assiete, car il est bien tost sec & faict monstrer l’or fort
beau.
Pour poinctes de diamants à graver
Elles sont pour trasser ce que tu veulx desseigner sur les
pierres & graver, & quand ces poinctes sont grasses & ne
peuvent mordre, il les fault frotter diamant contre diamant.
On les frotte avecq diamant pouldre de pierre ponce. Il fault
aussi despolir sur la roue de plomb, ou la pierre ou le verre
sur quoy tu veulx graver, car le poliment, qui est comme vernis au
verre, empesche le diamant ou saphir de bien mordre. Mays C’est
pourquoy il ne mord pas facillement sur l’ongle, qui est polie &
grasse. Mays quand le poliment est une fois osté, il mord
aysement.
Roue de cuivre à polir
Il fault, plustost qui polir ta pierre, la ter desgraisser bien,
la frottant d’un lopin de cuir en tour du costé de la chair,
en tournant ta roue s’il y a long temps que tu n’y as
travaillé.