011r - - - - - Paindre a huile desmail dazur
Cest un secret qui nest gueres cogneu des communs painctres
Aulcuns prennent le plus deslie quilz peuvent & le broyent avecq la
ceruse qui luy donne liaison Et apres picquent avecq une alaine
en plusieurs lieulx le lieu quilz veulent paindre dazur desmail
affin que lhuile y entre & sagoute & ne fasse poinct couler lazur
qui de soymesme est pesant Aultres couchent le tableau en plain
& y posent lasur Ce qui se faict aussi a destrempe Le principal
est de le bien brayer sur le mabre Et plustost lavoir lave fort
Aulcuns le broyent avecq fort avecq un jaulne doeuf & puys le
lavent en cinq ou six eaulx Et le couchent non avecq un painceau
qui seroit trop doulx Mays avecq une broisse fort adoulcie &
crespie & le coucher espes comme si on le posoit avecq une truelle
en se reposant il sunist et saplatist Jay experimente que broyer
lazur desmail avec jaulne doeuf & apres le laver en plusieurs
eaulx est bon Toutesfois il perd un peu de sa naifvete en le
broyant Je lay aussy lave avecq plusieurs eaulx & comme il estoit
un peu repose je retirois leau encores q bleue avecq une esponge
Et la pressois en un aultre vaisseau Ainsy ou elle se reposoit & de la resideue javoys la cendre
la fleur et le plus subtil de lazur sans le broyer qui est
le meilleur car en le broyant il perd de sa taincture Ceulx qui
en allemaigne le font Le composent comme esmail en grandes
pieces lesquelles ilz pillent & passent par plusieurs tamis &
les lavent
Pour faire les azurs beaulx ilz les lavent ou destrempent
avecq un eau de roche quilz appellent cest une eau distillee
des mines ou lazur ou vert dazur se trouve qui naturellement
distille par les veines de la montaigne Ou qui est par
alambic distillee par des pierres mineralles dazur ou
cuivre
Les cendres dazur ne sont bonnes que pour les paisages car elles
se meurent a huile Il ny a que lazur vray qui tienne Lazur desmail
sil est trop gros ne se peut travailler Essaye le doncq sur longle
ou sur la pallette a huile sil se trouve areneus Ne le broye pas
sinon avecq le jaulne doeuf Ou pour mieulx lave le en eau
claire & avecq une esponge retire leau coloree apres quil comance
daller a fonds Et en ceste sorte tu retireras la fleur fort deliee
qui sera aysee a travailler