011 - - - - - Paindre à huile d’esmail d’azur
C’est un secret qui n’est gueres cogneu des communs painctres.
Aulcuns prennent le plus deslié qu’ilz peuvent & le broyent avecq la
ceruse qui luy donne liaison, et apres picquent avecq une alaine
en plusieurs lieulx le lieu qu’ilz veulent paindre d’azur d’esmail
affin que l’huile y entre & s’agoute & ne fasse poinct couler l’azur,
qui de soy mesme est pesant. Aultres couchent le tableau en plain
& y posent l’asur, ce qui se faict aussi à destrempe. Le principal
est de le bien brayer sur le mabre et plus tost l’avoir lavé fort.
Aulcuns le broyent avecq fort avecq un jaulne d’oeuf & puys le
lavent en cinq ou six eaulx, et le couchent non avecq un painceau,
qui seroit trop doulx, mays avecq une broisse fort adoulcie &
crespie, & le coucher espés comme si on le posoit avecq une truelle;
en se reposant, il s’unist et s’aplatist. J’ay experimenté que broyer
l’azur d’esmail avec jaulne d’oeuf & aprés le laver en plusieurs
eaulx est bon. Toutesfois il perd un peu de sa naïfveté en le
broyant. Je l’ay aussy lavé avecq plusieurs eaulx, & comme il estoit
un peu reposé je retirois l’eau encores q bleue avecq une esponge
et la pressois en un aultre vaisseau Ainsy ou elle se reposoit, & de la resideue j’avoys la cendre,
la fleur et le plus subtil de l’azur sans le broyer, qui est
le meilleur, car en le broyant il perd de sa taincture. Ceulx qui
en Allemaigne le font le composent comme esmail en grandes
pieces, lesquelles ilz pillent & passent par plusieurs tamis &
les lavent.
Pour faire les azurs beaulx, ilz les lavent ou destrempent
avecq un eau de roche qu’ilz appellent, c’est une eau distillée
des mines où l’azur ou vert d’azur se trouve, qui naturellement
distille par les veines de la montaigne ou qui est par
alambic distillée par des pierres mineralles d’azur ou
cuivre.
Les cendres d’azur ne sont bonnes que pour les païsages car elles
se meurent à huile. Il n’y a que l’azur vray qui tienne. L’azur d’esmail,
s’il est trop gros, ne se peut travailler. Essaye le doncq sur l’ongle
ou sur la pallette à huile. S’il se trouve areneus ne le broye pas
sinon avecq le jaulne d’oeuf, ou pour mieulx lave le en eau claire
& avecq une esponge retire l’eau colorée aprés qu’il comance
d’aller à fonds, et en ceste sorte tu retireras la fleur fort deliée,
qui sera aysée à travailler.