010v - - - - - Pour paindre à huile sur
taffetas sans que l’huile coure
Il fault faire couche de batture, qui se faict de miel bien
cuit & tourmentine de colle forte trempée 24 heures dans
l’eau, puys legierement mise à bouillir affin qu’elle ne soict
gueres forte. Aprés mesles y pour l’adoulcir un peu
de miel & faicts bouillir tout ensemble. Et sur
ceste couche, qui sera bientost seiche, tu pourras paindre à
huile, qui adoulcira encores davantage la couche, qui te
peult aussi servir à faire assiete d’or. L’eau d’alum garde
aussi l’huile de courir.
Assiete d’or de foeuille sur parchemin
ou papier
Fais colle d’amydon fort clere & qui ne demonstre poinct
avoyr de corps. Et en fais six ou cinq couches, & sur la
derniere, estant demy seiche, aplique ton or.
Pour nettoyer l’or de foeille
posé sur le fer
Frotte tes armes ou aultres pieces dorées de fiente
de cheval seche
Pour blanchir la ceruse
Fais durcir des œufs, partis les par moictie & oste le
jaulne & entre les deulx moictiés du blanc mects un lopin
de ceruse & les lie avecq du filet. Puys fais bouillir dans
eau claire & elle deviendra toute noire, & ainsy la ceruse
demeurra bien purifiée. Aulcuns la font recuire au feu,
& devient fort blanche.