010v - - - - - Pour paindre a huile sur
taffetas sans que lhuile coure
Il fault faire couche de batture qui se faict de miel bien
cuit & tourmentine de colle forte trempee 24 heures dans
leau puys legierement mise a bouillir affin quelle ne soict
gueres forte Apres mesles y pour ladoulcir un peu
de miel & faicts bouillir tout ensemble Et sur
ceste couche qui sera bien tost seiche tu pourras paindre a
huile qui adoulcira encores davantage la couche qui te
peult aussi servir a faire assiete dor Leau dalum gardee
aussi lhuile de courir
Assiete dor de foeuille sur parchemin
ou papier
Fais colle damydon fort clere & qui ne demonstre poinct
avoyr de corps Et en fais six ou cinq couches & sur la
derniere estant demy seiche aplique ton or
Pour nettoyer lor de foeille
pose sur le fer
Frotte tes armes ou aultres pieces dorees de fiente
de cheval seche
Pour blanchir la ceruse
Fais durcir des œufs partis les par moictie & oste le
jaulne & entre les deulx moicties du blanc mects un lopin
de ceruse & les lie avecq du filet puys fais bouillir dans
eau claire & elle deviendra toute noire & ainsy la ceruse
demeurra bien purifiee Aulcuns la font recuire au feu
& devient fort blanche