010r - - - - - Jaspe contrefaict
Ayes de la corne dequoy on faict les lanternes bien deliee & dessoubs
fais la figure de ton jaspe de cornalines & aultres pierres
qui sera ouvrage plus propre que dessus le verre qui est trop luisant
Et la corne represente un lustre & polyment gras comme le jaspe
Tu scais comme avecq la raclure de ladicte corne les roses se peuvent
imiter Les corne couleurs pour ce jaspe veulent avoyr fonds avecq
la tourmentine claire ou vernis daspic Et les couleurs mattes en corps
ni sont pas si propres combien quelle soiect fort belles Il fault
huiler dhuile daspic le revers non painct
at top margin
Le verre tanvre pour cest effect est fort beau
at left top margin
Tu en peulx incruster
des licts & y peulx
sur les joinctures
jecter de la limaille
de talc ou despingle
sur le ciment
frais desdictes joinctures Il les
fault joindre
avecq de la gomme
armoniac
destrempee en
vinaigre pour
mieulx contrefaire
jaspe grumeleux
aplique des laines
a gros poil tainctes
de diverses couleurs
& entresmeslees
Apres que tu as
couche toutes les
couleurs esgratigne
sur icelles des
lignes obliques
puys couche
de lor & argent
en foeille
Si tu couches
sur la corne
des couleurs de tourmentine
donnes y un
fonds dargent
ou de foeille
destaing Tu peulx
aussy limer
de la corne & la
mesler avecq colle
forte & la coucher
sur les joinctures
de la piece de
corne puys lunir
avecq le rabot
Scudegrun
Il se faict a lyon avecq du suc de gaulde & de la croye incorporee
ensemble ou pour mieulx avecq de la ceruse qui est propre a
destrempe et a huile
Roses
Se contrefont ou avecq rasclures de corne de lanternes
ou avecq rasclures de parchemin bien claires & deliees & tainctes
& employees comme tu scais
Couleur de pourpres
Les painctres la font belle faisant la premiere assiette dazur
commun ou pour mieulx dazur desmail & apres ilz glassent de laque
qui sera plus propre a cela si tu y mesles de lalum qui luy
donne taincture violette selon la quantite que tu en mesles
Pouldre dhorloges de sable
Elle se faict fort subtille & sans estre subgecte a la rouille & par sa pesanteur
coulante prenante du plomb i lb et le faire fondre et lescumer et
purifier de sa crasse puys verse dedans quattre ℥ de sel commun
pulverise subtilement et prends bien garde quil ny aye ni pierre
ne terre Et incontinent que tu lauras verse mesle tousjours
tres bien avecq un fer jusques a ce que le plomb et le sel soict bien
incorpore et leve le incontinent du feu tousjours meslant Et sil te
semble trop grossier broye le sur le mabre et le passe par un tamis fin
puys lave le tant de fois que leau sembl soict claire jectant ceste petite
pouldre qui nagera renovant tant de fois leau quelle demeure toute unie