009r - - - - - Laboureur
Pource que le millet est de nature fort sec, les mestiviers
le plus souvent le battent de nuict, à la frescheur & aux
rays de la lune. Ce qui ne se pourroict faire d’aultrebled
qui est plus humide, car il le fault laisser passer les
rayons du soleil par dessus, et gueres on ne bat que le
soleil ne soit vers le midy. Incontinent que le mil est
couppé, il fault labourer la terre, car la racine la
mange & amaigrist aultant comme si le millet estoit en pied.
La terre où le millet aura este semé diminue bien de sa
fertilité & c, ce qui se coignoist bien à la prochaine semence
qu’on faict aprés. Mays surtout le bled appellé pomole
en Gascoigneou baillard en France, faict selon le dire
commun trembler la terre sept ans aprés Les febves
ameliorent & amendent le solage, pourveu qu’on y laisse
pourrir les racines et tyges.
Painctre
Aulcuns aprés avoyr couché leur couleur adoulcissent avecq
le plat d’une plume. Mays le gros pinceau est le meilleur.
Marchant
Ilz ont communement quattre livres. Le tyrant, qui est un
formulayre pour les aprentifs, par lequel ilz peuvent sçavoir
ce que chasque piece de marchandise tire et co à combien elle se
doit vendre. Le second est le broillart, où grossierement ilz mectent
ce qu’ilz vendent journellement. Le tiers est le livre de vente, où
ilz reduisent au net et mectent le compte par le menu de ce qui est
contenu au broillart. Le quatriesme est le livre de raisons,
qui faict mention de la vente, du compte arresté, de la cedulle
& du terme du payement, & à cestuy cy l il est adjouxté foy en
jugement.