008r - - - - - Lettre d’or sur papier
Escripts avecq du laict de figuier puys laisse un peu
seicher, aprés pose l’or en feuille, & estant bien sec, frotte
avecq un linge, et la seule lettre demeurera.
Pour rompre grenades et donner
violence aux artifices de foeu
Mects parmy la pouldresix fois autant de vif argent
et la sixiesme partye d’icelle de vif argent.
Trempe de balle pour fausser
armes a preuve
Chaufe la balle de plomb le plus que tu pourras sans
fondre, et comme elle sera bien chaulde, trempe la dans le
plus fort vinaigre que tu pourras. Et fais cela quattre
ou cinq fois. Aprés hache du lard bien menu & du linge
aussi bien subtilement, mesle tout ensemble & t’en sers comme
de bourre, et le fais entrer un peu à force & fort justement
dans l’harquebuse ou pistole. Et plustost que tirer cha, fais
s’il est possible que la balle soict chaulde.
Pour de nuict fayre bresche
en une muraille
Ayant faict trou dans la muraille comme tu sçais, mects
un mortier dedans, chargé de pouldre, qui soict quasi comme
couché et l’aultre droict, puys bouche le trou et donne foeu.