007v - - - - - Pour donner couleur de toute
sorte de metaulx au boys & aultre chose
Prenés pierre de touche & pierre ponce, aultant d’un que d’aultre,
& les broyés ensemble & destrempés avecq colle de retailles
plus forte que pour paindre & peignés en ce que vous vouldrés.
Estant sec, frottés ceste couche de quelque metal que ce soict
puys le brunissés.
Contre la colique venteuse
Prenés une douzaine de noix communes seiches & l’une aprés
l’aultre gectés les en un bon brasier où elles se puissent
enflammer & les tirés avecq des pincettes et les laissés
ardre & bien esprendre en l’air, et les estaignés dans
un verre de bon vin. Aprés laissés froidir le vin et le
coulés & en versés la moictié, car six noix estainctes
sont pour une dose. Excellent remede contre la suffocation
de matrice.
Pour oster la douleur de la gout
Prenés demy lb. de marquasite dorée & jaulne subtillement pulverisée,
demy once de storax, 4 lb. d’urine, incorporés bien tout
ensemble peu à peu dans un mortier, puys faictes bouillir
bien fort tout ensemble. Mays il fault que le pot soict bien
couvert affin que la fumée n’exhale poinct. Aprés distillés
l’urine cest imbibée & separée par inclination en un alembic
bien luté & couvert d’un chapiteau de cuivre, & imbibés un
linge de ladicte eau & l’apliqués tiedement sur la douleur.
Contre gonhorrea
Aquae fabrorum antiquae lb. i, boli Armeniae in tel tenuissimum
pollinem redactae ℥ i, mellis communis ʒ iii, coquantur ad mellis
despumationem. Tum refrigerata colentur cum forti expressione
& de colatura utatur per iniectionem.