007r - - - - - Pour dorer d’or couleur et d’or bel
Comme tu as doré coloré, faict ton estampe ou d’estain comme dict
est ou de fer dest ou de cuivre, il ne t’y fault poinct mectre de
couche de colle comme sur le bois, mays seulement ayes de
l’huile gras, qui se faict en sept ou huict jours au soleil avecq
de l’huile de noix et du blanc de plomb & avecq, la remuant
souvent, ou la faire cuire sur le foeu, qui aura haste. Puys,
avecq l’huile ainsi gras, broye un peu de blanc de plomb, de
massicot & de mine de plomb à discretion, aultant d’un
que d’un aultre. Le minium donne couleur à l’or. Aprés, avecq
cela, vous en faictes couche sur vostre stampe uniment, gardant
de ne remplir pas les concavités. Et comme il sera quasi sec,
poses la foeille d’or dessus avecq du cotton. Cet or tiendra
à la pluye sur les maysons & ailleurs. Et si tu auras doré
d’or bel, colore le avecq fumée de perdrix ou de drap rouge
ou jaulne & il sera beau comme l’or fin. Tu peulx garnir bahus,
mirouers, pantes & quenoilles de lict de velours ou satin de couleur,
puys y apliquer les stampes dorées dessus avecq colle forte.
Pour colorer bahus stampés
La stampe de lamine de cuivre ou letton se faict sur du bois
de cormier gravé & taillé, qui veult espargner. Et aprés, la
chose stampée se colore avecq les susdictes couleurs de laque,
verdet, azur d’esmail, & destrempes en vernis de tourmentine.
Mais au lieu que tu vouldras azurer, pose du fer blanc, qui
est plus propre pour le fonds d’azur.
Doublets
Le bon sang de dragon destrempé en eau de vye porte son
mastic ou colle soy mesme, comme aussi faict le verd de vessie & le
safran.
Colle de poisson ou usblacet colle de
bouche
Elle se faict avecq peau de moulue boullie plustost qu’estre
salée. Les menusiers en collent leurs chef d’oeuvre et les quiterniers
s’en servent aulx ouvrages delicates. Elle veult estre fort battue
puys destrempée doulcement en eau qui ne bouille gueres.
La colle de bouche se faict de ratisseures de parchemin et on s’en
sert sans feu pour coller papier ou choses semblables, la mouillant
avecq la bouche.
at left bottom margin
On la bat et faict
tremper en eau de vye
de vinaigre en vin
blanc une nuict, puys
on la faict fondre
à feu lent. Aultres
la destrempent en
eau de vye