006v - - - - - Pour ga cach cages
Tu les peulx embellir avecq des canulles d’esmail de diverses
couleurs, en revestant le fil d’archal ou de fer desdictes canulles.
Lesquelles tu rompras nettement à telle longueur que tu vouldras,
si tu encoches un petit l’endroict à rompre avecq une lime qui
couppe, et ne se rompront poinct en aultre endroict. Tu les peulx
courber avecq un modelle de bois sur un rechault ou bien à la
chaleur de la lampe. Il se tire aussi si long que tu veulx dans
un petit fourneau faict comme un four de reverberation, qui
touteffois est percé des deulx costés. Et quand la grosse canulle
est rouge, ilz empoignent le bout chault avecq des pincettes à
long bec, de sorte qu’une poincte du bec de la pincette entre dedans
le bout de la canulle, & par ainsy il s’alonge sans se boucher,
& l’aultre bout de la canulle se tient avecq la main pource que
elle n’est poinct chaulde. Quand la canulle est assez estirée,
celuy qui travaille assis, ayant son fourneau de la grandeur
d’un pot d’oeillets devant luy, la rond & continue. C’est pour
faire canulles pour cappes qui se couppent comme dict est avecq
la lime. Les boutonniers aussi de verre s’aident dudict fourneau.
Figure
at right middle margin
Soubs la porte y a
une grille qui soubstient
le charbon allumé,
& la cendre se vuide
tournant du four ce
dessus dessoubs.
Pour stampes à embellir et incruster
ou revestir le bord des mirouers ou dessus
de coffres ou frises des pantes de lict
Grave sur fer ou cuivre avecq de l’eau fort ce que tu
y auras poncé et desseigné, aprés nettye le avecq le burin
ou ciseau. Puys gecte de l’estain doulx qui n’a poinct servi
sur du marbre poly, & avecq une planche de bois l’aplatis
bien tanvre. Ou bien gecte le en table comme le plomb, ou le
passe par la presse à rouleaux. Aprés pose ta planche
d’estain sur la chose gravée & sur la planche d’estaim pose
une piece de feultre & frappe avecq un marteau dessus. Puys
le dore en ceste sorte.