006r - - - - - Pour poser et assoir d’or bruny et donner
rouge ou verd ou bleud
La ceruse & blanc de plomb n’est pas propre pour blanc poly
ne pour brunissement pource qu’elle est grasse, mays elle est bien
bonne pour or mat qui se faict à huile, la meslant avecq ocre
jaulne & mine po & destrempant le tout à huile. Et cest or mat
ainsy apliqué dure à la pluye comme les plomberies dorées
& choses semblables. Doncques pour or bruny prens de
bonne craye bien blanche, bien broyée & destrempée avecq colle
à destrempe, & en fais quattre couches, l’une aprés l’aultre, sur
le bois. Et la derniere estant seiche, frotte la avecq de la
prele, qui est une herbe aultrement appellée queue de cheval, pour
la rendre bien polye. Aprés ayes du fin boli armeni & de la sanguine,
aultant d’un que d’aultre, aussy gros de suif de mouton comme
une febve ou un poys selon la quantité du bol, et un petit de
charbon de saule ou aultant que de suif, & une demy coquille de
nois pleine de safran demy bruslé. Aulcuns y mectent un peu de
sucre candy. Broyés tout ensemble avecq eau, & l’apliqués sans
gomme ne colle, & laissés seicher, & frottés le lieu que vous vouldrés
dorer avecq un lopin de drap blanc pour mieulx unir, & quand
le lieu frotté est un peu luisant, c’est signe que l’or se portera
bien. Ayant frotté, lave avecq un pinceau net imbu d’eau claire
le lieu que tu veulx dorer & soubdain aplique l’or, lequel tu
bruniras estant sec. Et si tu y veulx poser du rouge cler & en
glasser de, braye de la laque platte de Venise sur le mabre
avecq de l’huile de noix ou de lin. Estant brayé, mesle du
vernis de tourmentine ou d’aspic & apliques sur l’or avecq
le pinceau. Le bresil & la laque ronde se meurent. Pour vert,
destrempe verd de gris avecq huile de noix ou de lin & le
braye, aprés mesles y du vernis de tourmentine & non d’
aspic, qui ne convient pas avecq le verdegris. Si tu veulx
glacer d’azur, il le fault poser sur argent bruny et
prendre azur d’esmail, & sans brayer destrempe le avecq
vernis de tourmentine & l’aplique.