006r - - - - - Pour poser et assoir dor bruny et donner
rouge ou verd ou bleud
La ceruse & blanc de plomb nest pas propre pour blanc poly
ne pour brunissement pourcequelle est grasse Mays elle est bien
bonne pour or mat qui se faict a huile la meslant avecq ocre
jaulne & mine po & destrempant le tout a huile Et cest or mat
ainsy aplique dure a la pluye comme les plomberies dorees
& choses semblables Doncques pour or bruny prens de
bonne craye bien blanche bien broyee & destrempee avecq colle
a destrempe & en fais quattre couches lune apres laultre sur
le bois Et la derniere estant seiche frotte la avecq de la
prele qui est une herbe aultrement appellee queue de cheval pour
la rendre bien polye Apres ayes du fin boli armeni & de la sanguine
aultant dun que daultre aussy gros de suif de mouton comme
une febve ou un poys selon la quantite du bol et un petit de
charbon de saule ou aultant que de suif & une demy coquille de
nois pleine de safran demy brusle aulcuns y mectent un peu de
sucre candy Broyes tout ensemble avecq eau & lapliques sans
gomme ne colle & laisses seicher & frottes le lieu que vous vouldres
dorer avecq un lopin de drap blanc pour mieulx unir & quand
le lieu frotte est un peu luisant cest signe que lor se portera
bien Ayant frotte lave avecq un pinceau net imbu deau claire
le lieu que tu veulx dorer & soubdain aplique lor lequel tu
bruniras estant sec Et si tu y veulx poser du rouge cler & en
glasser de braye de la laque platte de venise sur le mabre
avecq de lhuile de noix ou de lin Estant braye mesle du
vernis de tourmentine ou daspic & apliques sur lor avecq
le pinceau le bresil & la laque ronde se meurent Pour vert
destrempe verd de gris avecq huile de noix ou de lin & le
braye apres mesles y du vernis de tourmentine & non de
aspic qui ne convient pas avecq le verdegris Si tu veulx
glacer dazur il le fault poser sur argent bruny Et
prendre azur desmail & sans brayer destrempe le avecq
vernis de tourmentine & laplique