005v - - - - - [continued]
fisselle & representera aussi un teston grand comme une
assiette, et les femmes voyent les lieulx secrets qu’elles ne veulent
pas monstrer aulx chirurgiens. Il gecte la representation
hors de soy, et si tu touches du doigt le lieu l’oeil de
la representation, un aultre doigt viendra contre le tien.
Tu feras lumiere bien loing de nuict à quelqu’un si tu
poses le mirouer concave derriere la chandelle posee sur
la fenestre. Tu liras & escripras bien loing de la
chandelle si tu le poses derriere la chandelle & poses & tourne
la concavité vers toy. Si tu mects le mirouer au bout de la
table & une chandelle dessus, il te representera deulx
lumieres sur la table. Pour voir ce qui se faict en une
rue, ferme une fenestre, ou le plus que tu en fermeras sera
le meilleur. Fais à celle d’embas un trou gros comme le
petit doigt tout rond de part en part puys pose une foeuille
de papier sur la fenestre & que le milieu de la foeille
soict sur le trou. Perce la foeille à l’endroict d’iceluy & de
sa mesme grandeur. Aprés adapte la face concave du
mirouer vers le trou & il te representera tout ceulx qui
passeront en la rue sur la foeille de papier. De mesmes
à la porte percee d’une chambre fermee. Tu en peulx
faire d’ondes & triangulaires & de la facon que Ptolomee
descript & Archimedes. Le concave aussy mect le foeu de
bien loing à de la paille, allume une chandelle, avecq le
soleil. À la reverberation aussy du foeu, il eschaufe.
Pour bronser de blanc et jaulne
Prends estaim de glace et le fais fondre, mects sur demy lb.
d’iceluy demy once d’argent vif et l’oste tout aussy tost
du foeu & le broye, et il sera comme cendre. Broye Lave
le bien fort en eau nette, aprés broye le sur le mabre &
le destrempe avecq eau de ret colle de retaille. Aprés aplique
sur tes chandeliers de bois & aultre ouvrage qu’il te plaira,
& brunis avecq la dent. Tu peulx broyer la limaille d’espingle
& l’apliquer avecq ladicte colle.