005v - - - - - [continued]
fisselle & representera aussi un teston grand comme une
assiette Et les femmes voyent les lieulx secrets quelles ne veulent
pas monstrer aulx Chirurgiens Il gecte la representation
hors de soy Et si tu touches du doigt le lieu loeil de
la representation un aultre doigt viendra contre le tien
Tu feras lumiere bien loing de nuict a quelquun si tu
poses le mirouer concave derriere la chandelle posee sur
la fenestre Tu liras & escripras bien loing de la
chandelle si tu le poses derriere la chandelle & poses & tourne
la concavite vers toy Si tu mects le mirouer au bout de la
table & une chandelle dessus il te representera deulx
lumieres sur la table Pour voir ce qui se faict en une
rue ferme une fenestre ou le plus que tu en fermeras sera
le meilleur Fais a celle dembas un trou gros comme le
petit doigt tout rond de part en part puys pose une foeuille
de papier sur la fenestre & que le milieu de la foeille
soict sur le trou perce la foeille a lendroict diceluy & de
sa mesme grandeur Apres adapte la face concave du
mirouer vers le trou & il te representera tout ceulx qui
passeront en la rue sur la foeille de papier De mesmes
a la porte percee dune chambre fermee Tu en peulx
faire dondes & triangulaires & de la facon que ptolomee
descript & Archimedes Le concave aussy mect le foeu de
bien loing a de la paille allume une chandelle avecq le
soleil A la reverberation aussy du foeu il eschaufe
Pour bronser de blanc et jaulne
Prends estaim de glace et le fais fondre mects sur demy lb
diceluy demy once dargent vif et loste tout aussy tost
du foeu & le broye Et il sera comme cendre Broye lave
le bien fort en eau nette apres broye le sur le mabre &
le destrempe avecq eau de ret colle de retaille Apres aplique
sur tes chandeliers de bois & aultre ouvrage quil te plaira
& brunis avecq la dent Tu peulx broyer la limaille despingle &
lapliquer avecq ladicte colle